Kinoce atisokan

Peikw iriniw otanisipan.

Peikwaw e kicikarik otanisa ki nakickweriw ockinikiwa.  Nanake aci natawerimew naha ockinikiw kitci wikimatc nihi ickweca.

Moca aric mireritamopan naha iriniw e wi kokwetiskatowatc anihi ockinikiwa ka wi wikimaritci otanisa, mocak tca ko kanewipan.

Kiskerimepan tca naha ockinikiw ni e totamiritci.

Ekoni wirictam ka ici itatc kitci kokwetiskatatotcik e nicitcik. Aci itew nihi iriniwa : « Takon a ota pecotcik pawictikw ke ki acokwackotiikw»

Naha tca iriniw kiskeritamopan e ici takonik ki tca mireritam kitci kokwetiskatatotcik.

Kitca matcawok e nicitcik, ka takocinitcik pawictikok aci itew naha iriniw nihi ockinikiwa : «Ekota ota ke ici acokwackotikw.»

Itohwew nihi ockinikiwa naha iriniw e itatc wirictam kitci acokwackotiritci.

Acepataw  tca ockinikiw ekotca e ici matcepatatc kitci acokwackotitc.

Aci kotc notakosiw naha iriniw e iteritak ni ka kanewin.

Naha aric ockinikiw ki kackitaw e acokwackotitc.

Ka wapamatc naha iriniw aci kaie wir kata kotci acokwackotiw.

Matcepataw, kwackotiw… ekoni e pakopeparitc pawictikok. Ekoni e ki onitatc.

Nitcitciwepataw naha ockinikiw e micta tca kicipatatc e nta nantowapamatc.

Kek wapamew e taci sakikotciniritci.

Tecikotc ki nta akwapitew. Kekat ki apitcicin naha iriniw.

Ka waskamatisitc aci wapamew nihi ockinikiwa, itew maka :« Nanake aci ni ka kinocein. Patoc aric ki ka miskowaw tiripan kitci apikatimoin ».

Ekoni tca ka totak naha ockinikiw.

Minawatc ma ka aci iti kinocewiw naha iriniw e micta tca kockwapamotc naha ockinikiw.

Ekoni e ici kokitc atampekok naha kinocew.

Wiskata aci kwackwepitakaniwiw.